Nakabaling sa Iba

Ni Maris Gabornes

Ngayo’y nakaupo sa permanente kong upuan

Tumitingin sa gurong nakatayo sa harapan

Subalit ‘di nakikinig sa kanyang tinuturan

Sapagkat ang aking isip ay nalipad kung saan

Wala kang malay na ika’y aking naaalala

Nagtatanong kung ayos ka lang ba

Habang ang puso’y lihim na umaasa

Na sa iyong utak ako rin ang bida

Roon sa malayo, ika’y bagot sa iyong upuan

Ang guro sa harap ay iyo ring pinagmamasdan

Pero walang naiintindihan sa kanyang tinuturan

Dahil ang isip mo’y lumilipad sa kung saan

Isa sa ‘yong mga kaklase ang sa utak mo pala’y bida

Iniisip mo kung paano ba mapapalapit sa kanya

Habang lihim na umaasang ang klase niyo’y matapos na

Upang malapitan, mabiro at makausap mo na ulit siya.

 *****

Back-story
I wrote this in high school, during my Filipino class. (.....)